استكمال العناصر الغذائية
»»»»»»»»»»»»»»»»»»»»»
تعرفنا في المنشورات السابقة على اهم العناصر للنبات
وتعرفنا على كيفية حسابها كوحدات استنادا إلى نسبتها فى العبوة
وعملنا مسائل زى امتحانات زمان
النهارده هنتكلم على العناصر بردو بس من ناحية اخرى الا وهى شحنات العناصر دى
اولا لازم تعرف ان حبيبات التربة والغرويات والمادة العضوية بتكون سالبة الشحنه
غالبية العناصر المعروفة بتكون موجبة الشحنة
طيب ايه اللى هنستفادة من الكلام دة؟
كتييييير
اولا ان حبيبة التربة السالبة دى بتدمص( يعنى بيلزق عليها) كل العناصر ذات الشحنة الموجبة وبالتالى بتمنع فقد هذه العناصر فى محلول التربة وبتحتفظ بها للنبات ليستفيد منها
هو دة اللى يهمنا فى موضوع الادمصاص والذى يعرف ايضا بالسعة الكاتيونية للتربة
يا عم متلغبطناش ايه دى كمان
بص يا سيدى لو عندك عنصر وقلنا جدلا ان وزنه مثلا 5 ميلى مكافئ
وجبنا 100 جرام تربة وحطينا عليهم ال5 ميلى مكافئ دول
قامو ال100 جرام تربة لم يستطيعوا ان يدمصوا الا 4 ميلى مكافئ فقط على حبيباته
يبقى السعة الكاتيونية للتربة دى بتساوى 4 ميلى مكافئ
يعنى ايه بردو مش فاهم حضرتك؟
معنى كدة بردو يا حبيب ان كل 100 جم من التربة دى فيه شحنات سالبة تكفى لادمصاص 4 ميلى مكافئ من العنصر فقط
طيب كل انواع التربه بتكون ذات سعة كاتيونية واحده؟
لا طبعا
كلما صغرت حبه التربة كلما كانا السعة الكاتيونية اكبر
يعنى مثلا فى التربة الرمليه بتكون قليلة 3:2 ميلى مكافئ لكل 100جم تربة
الطينية اعلى 5:4
لكن المفاجأة بتكون فى المادة العضوية المتحللة وخاصة عندما يتحلل فيها حوامض الهيوميك والفولفيك ( احماض الدوبال) بتكون السعة الكاتيونية فيها عالية جدا قد تصل الى 400:250. 😯😯😯😯😯
وده سببه ايه يا معلم؟
الاحماض دى اما بتتحلل لعناصرها الاولية بتنتج مجاميع سالبة الشحنه كثيره منها مثلا مجموعة الكربوكسيل
هذه المجاميع بترتبط بشحنات موجبة كثيرة وبالتالى تحتفظ بأكبر قدر من العناصر على سطح هذه الماده العضوية
طيب الكاتيونات دى (العناصر الموجبة الشحنة) بتفضل ثابته مكانها على حبيبة التربة . مبتتحركش
هى مش بتتحرك لكن لازم يجى عنصر تانى بلطجى اقوى منها ويمشيها وياخد محلها عافية كده. وعشان يعمل كده لازم يكون اقوى بمعنى ان العنصر اللى شحنته اعلى يحل محل اللى شحنته اقل يعنى ابو شحنتين موجب ياخد محل ابو شحنة واحده وهكذا
والموضوع ده مهم جدا فى معالجة الملوحة اللى هنتكلم عنه البوست القادم
طيب انت عمال تكلمنا عن الكاتيونات وناسى الانيونات(العناصر ذات الشحنة السالبة)
لا دى بتكون متواجدة فى محلول التربة
طيب هو محلول التربة ده شحنته اية؟؟
ابدا مسكين ملوش شحنه متعادل يعنى
واجبنا نحو التربة ايه؟؟؟
محاولة رفع السعة الكاتيونية لاكبر درجة ممكنه لتحقيق اكبر استفاده من العناصر
ودى نعملها ازاى؟
لو معرفتش نعمل كدة ازاى تبقى مفهمتش المنشور يا معلم
البوست القادم معالجة الملوحة . انتظرونى
تحياتى إيهاب خليفة
إيهاب خليفة فيسبوك
يسعدنا تعليقك وتقييمك للموضوع