الموضوع الاهم فى عالم الزراعة (الملوحة)
»»»»»»»»»»»»»»»»»»»»»»»»»»»»»»»»»
من اهم الاسباب المحددة لزراعة اى محصول هى ملوحة التربة وملوحة مياه الرى
ملوحة التربة اختصارا لو عندك مياه حلوة مشكلتك ان شاء الله محلوله
ملوحة المياه هى المحددة اكثر حيث كلما زادت اصبحت الحلول اصعب
عشان نبسط الموضوع لن نتطرق لمصطلحات
بص يا عم الحاج لو المياه او التربة بتاعتك فيها شوية عناصر زيادة عن اللزوم يبقى عندك ملوحة
طيب ايه اخطر عناصر ممكن لو وجدتها اخاف منها واقول عندى مشكلة؟
الاجابة ملح الاكل اللى المدام بتطبخ بية والاكل مينفعش من غيرة واللى بتعمل بيه مخللات وركز فى موضوع المخلل ده عشان هاديك وصفة محترمة لعمل المخلل
اولا بتجيب كمية من الملح وتضعها فى برميل وتظل تقلب حتى يذوب تماما وستعرف ان مقاديرك مضبوطة اذا وضعت بيضة سليمة فى البرميل ووجدتها طفت على سطح الماء
رغم انك لو وضعتها فى ماء عذب كانت غطست
وبعدين يا حاج تجيب بقة الجزر واللفت والقرنبيط والزيتون وتحطهم فى البرميل وتسيبهم اسبوع الى عشر ايام هيبقى عندك مخلل محترم
ايه ده ايه ده انت قلبت صفحتك الشيف شربينى والا ايه يا هندسه ؟
يا عمنا كلمنا على الملوحة مش المخلل😤😤😤😤😤
ما هى دى مشكلة الملوحة بس انت اللى مش واخد بالك
ازاى يعنى مش فاهم
انت بعد عشر ايام من عمل المخلل ايه اللى حصل
يووووه هيقولى مخلل تانى . ماشى يا عم المخلل بقى حادق وطعمه جميل استريحت
طيب مكونات المخلل. دى كانت ايه نبات والا حيوان والا جماد. طبعا نبات
طيب ايه اللى يخلى طعم حاجة مسكرة زى الجزر مثلا تبقى مالحة؟؟؟
انا اقولك. كل النباتات دى كانت فيها مياه من جوه وكانت المياه دى محفوظة داخل اغشية الخلايا
الاغشية دى شبه منفذة يعنى بتسمح بدخول وخروج الماء منها بنسبة معينة
لما انت وضعتها فى المحلول الملحى ده حصل ان التركيز بتاع المحلول ده طلع اعلى من تركيز المحلول اللى جوا النبات
المحلولين دول منخفض ومرتفع التركيز يقعدوا ساكتين وكل واحد فى حالة ( ما احنا قلنا قبل كده مفيش حد بيسيب حد فى حالة يا بنى)
يقوم المحلول مرتفع التركيز ساحب المياه من النبات عشان يعادل تركيزة فى نفس الوقت المحلول المنخفض يسحب محلول ذو تركيز مرتفع عشان يعادل هو كمان تركيزة ويفضلوا على دا الحال لحد ما التركيزين يبقوا زى بعض
طيب دى حاجة كويسة والا وحشة
كويسة فى المخلل طبعا 😂😂😂😂😂 لكن مع النباتات المزروعة لا طبعا
المحلول الارضى الملحى حول جذور النباتات هو هو تاثير المحلول الملحى فى المخلل
ضيف الى ذلك تاثير العناص دى اذا دخلت داخل النبات الحى مما يؤدى الى ما يسمى السمية واختلال فى وظائف النبات ويظهر علية اعراض الملوحة المعروفة
ملحوظة ( طريقة عمل المخلل طريقة صحيحة ومجربة للى بيفكر يعمل يعنى😋😂😂😋😋
إيهاب خليفة فيسبوك
يسعدنا تعليقك وتقييمك للموضوع