اروى العنب كام ساعة وكل كام يوم
====================
السؤال الاشهر والاكثر طلبا للمزارعين
لكن إجابته ليست بالبساطه التى يتخيلها البعض
عشان تجاوب على السؤال ده محتاج تعرف شوية حاجات تعالوا نفكر بعض بيهم
اولا نوع الارض (رمليه خشنه. رمليه ناعمة . رمليه طفليه. طفلية. طينيه طفليه . طينية)
ثانيا درجة الحرار
ثالثا المرحله المورفولوجيه للمحصول
رابعا ملوحة الماء
خامسا كفائة الشبكه ونوعها
سادسا معامل البخر نتح
طيب نوع التربة هناخد منه حاجة اسمها السعة الحقليه . ايه السعة الحقليه دى؟
دى يا سيدى باختصار كمية المياه التى تستطيع التربة الاحتفاظ بها بعد نزول الماء الحر بفعل الحاذبية لاسفل. وايه الماء الحر ده كمان
ببساطة لو عندك اسفنجه وحطيت عليها مياه ايه اللى هيحصل
الاسفنجه هتشرب المياه حتى تمتلئ
جميل طيب لو فضلت تحط مياه بعد امتلاء الاسفنجة دى المياه الزياده بتروح فين
بتتصرف بعيد عن السفنجه
اهو اللى بيتصرف ده واللى السفنجة مش قادرة تحتفظ بيه اسمه الماء الحر
والماء الموجود فى السفنجة بعد التخلص من الماء الحر مباشرة اسمه حالة التشبع واللى السفنجة لا تستطيع ان تستقبل اى ماء بعده
واللى فضل فى السفنجة بعد ما تسيبها فترة من الزمن (٤٨:٢٤ساعة فى حالة الاراضى) ومبقاش ينقط منها اسمه السعة الحقلية
ولما تعصر السفنجة جامد جدا لدرجة انها متنزلش مياه خالص رغم ان فيها جزء مياه لكن السفنجة مش راضية تسيبة ينزل اسمه ماء هيجروسكوبى
الماء الحر والماء الهيجرسكوبى ماء لا يستفيد منه النبات
ما بينهما يسمى السعة الحقليه وهو الماء الذى يستفيد منه النبات
الماء ده بيكون ممسوك بقوتين قوة شد حبيبات التربة وقوة شد بين جزيئاته هو نفسة
القوة اللى ماسكه الماء ده بتساوى 0.1: 31 بار وهى قوة ميسرة للنبات ويستطيع ان يسحب منها الماء بسهولة
الماء الهيجرسكوبى بيكون ممسوك بقوه حول الحبيبة تعادل 31: 10000بار ودى قوة لا يستطيع النبات سحب الماء منها
واذا وصل النبات لهذه الحاله يصل لما يسمى بنقطة الذبول
وهى نوعين. ذبول مؤقت يعنى النبات ممكن يرجع يشتغل تانى بعد زوال الظروف المؤديه له واضافة الماء له مرة اخرى
وذبول دائم وده النبات مبيرجعش لحالته وبيموت لو وصل لها
اذا يجب ان نحافظ على جذور النبات داخل نطاق السعة الحقليية
Field capacity او ال
كما يحلو للبعض نطقها . بس انا باحبها بالعربى 😂😂
طيب السعة الحقلية دى كام ( نقلا عن احد المحاضرات لاستشاريين معروفين هى كالتالى)
كل متر مكعب من التربة يستطيع ان يحتفظ بكميه مياه باللتر كالتالى
رمليه خشنة. 30 لتر
رمليه ناعمة. 60 لتر
رمليه طفليه. 80 لتر
طفلية. 100 لتر
طينية طفليه. 120 لتر
طينية. 140 لتر
ايه معنى الكلام ده. معناه انك لو جبت متر مكعب تربه وملأته ماء حتى وصل لدرجة التشبع ثم تركته فترة زمنية معينه ليتم تصريف الماء الزائد حتى تتوقف الارض عن فقد الماء لاسفل فما يتبقى فى التربة يسمى السعة الحقلية
وحتى لا نطيل نكمل البوست القادم
تحياتى إيهاب خليفة
إيهاب خليفة فيسبوك
يسعدنا تعليقك وتقييمك للموضوع