ازاى اقدر احسب كميات المياه اللازمة لفدان العنب؟
=====================================
عشان تجاوب على السؤال ده محتاج تعرف شوية معلومات هنستعرضهم مع بعض
اولا ماتورك فى المزرعة بيطلع كام متر مياه فى الساعة؟
وعشان اريحك واسهل عليك الامور هنفترض الاجابات بارقام
هنفرض انه بيطلع ١٠٠ متر مكعب فى الساعة. تمام؟ تمام
السؤال التانى ال١٠٠ دول يروا كان فدان
علشان نعرف عدد الأفدنة تبقى محتاج تعرف النقاطات بتاعتك على كام سنتميتر وتصريفها كام
لو فرضنا انها على ٥٠ سم والتصريف ٤لتر ساعة
طيب الفدان فيه كام نقاط؟ فيه ٢٨٠٠ نقاط
جم ازاى ٢٨٠٠ نقاط
طريقتين اولا الفدان فيه ٧٠٠ شجرة مابين الشجرة واختها ٢ متر يبقى الشجرة لها ٤ نقاط
٤*٧٠٠=٢٨٠٠نقاط
الطريقة الثانية الفدان طولى فى العنب بيكون ١٤٠٠ متر ؟ برده جات ازاى
مساحة الفدان ٤٢٠٠ م٢ نقسمه على عرض خط العنب اللى هو ٣ متر هيكون الناتج ١٤٠٠ متر طولى
والمتر فيه نقاطين يبقى المجموع ٢٨٠٠ نقاط
نرجع لموضوعنا
٢٨٠٠ نقاط * ٤لتر=١١٢٠٠ لتر فى الساعة
نحولهم لمتر مكعب ماء. ١١٢٠٠/١٠٠٠=١١.٢ متر مكعب/ساعة
هنقرب العدد شويه مع حساب الفاقد نتيجة بعد المسافة وقدرة الموتور وعوامل اخرى
يبقى نقدر نقول ١٢متر مكعب /ساعة
اذا الموتور يستطيع رى عدد فدادين يساوى ١٠٠متر فى الساعة/ ١٢ متر للفدان فى الساعة
يكون الناتج ١٠٠متر /١٢ متر للفدان فى الساعة
اذا الموتور يستطيع رى ٨ فدان تقريبا
طيب لو خرطومين . يبقى يروى ٤ فدان
طيب لو النقاطات على بعد ٣٠ سم وتصريف ٤ لتر ساعة
بنفس الخطوات السابقة
١٤٠٠متر ( طول فدان العنب )/ ٠,٣م (اللى هى ٣٠ سم بس محوله للمتر)
تساوى ٤٦٦٦نقاط
نضربهم فى تصريف النقاط (٤لتر/ساعة) يكون الناتج تقريبا ١٨ متر مكعب ماء فى الساعة
اذا الموتور ال١٠٠ متر يروى كام فدان
١٠٠متر (تصريف الموتور)/١٨ متر ( الفدان الواحد)
يساوى تقريبا ٥.٥ فدان. قول ٥ فدان
طيب لو خرطومين يبقى ٢.٥ فدان
ونعتبر ده مدخل للرى وان شاء الله نكمل البوستات القادمه
تحياتى إيهاب خليفة
إيهاب خليفة فيسبوك
يسعدنا تعليقك وتقييمك للموضوع