واحد قاعد فاضى فى المعمل بتاعة قالك
الكيميا دى مبتاكلش عيش
انا هاشوف شغلانة تجيب لى دهب وانا قاعد
قام جاب شوية بول وحطهم فى اوانى ومستنى يتحولوا لدهب
القعدة طولت قام واخد الاوانى دى ومسخنها
وحصلت المفاجأة
ايه؟ اتحول لدهب؟؟؟
لا طبعا
اتحول لفوسفور مشع بتاع الاكسسوارات دة اللى بينور فى الظلام
وبتاع السبحة اللى كنت بتنزل تحت السرير عشان تشوفها بتنور والا لا
بس عامة احنا مالناش دعوة بالكلام الفاضى دة
اومال داوشنا ليه خش فى الموضوع يا عم الحاج
الموضوع
بص بقة يا هندسة
الفوسفور دة من العناصر اللى بيحتاجها النبات بكميات كبيرة يعنى من العناصر الكبرى
وبيسموه عنصر الطاقة ومش للنبات بس دا كمان للانسان للناس اللى بتحب الاكلات البحرية خاصة الجمبرى
يعنى النبات بيحتاج الفوسفور دة عشان الطاقة دى
تخيل ان مركبات الطاقة اللى جوة النبات مسمينها باسم الفوسفور
ADP ادنين ثنائى الفوسفات
ATP ادنين ثلاثى الفوسفات
مش كدة بس
دا بيدخل فى عديد من الاحماض الامينية والبناء الضوئى وانقسامات الخلايا وامتصاص الماء والعنصر الرئيسى فى دورة الطاقة
طيب اعرف ازاى اعراض نقص الفوسفور
بص عشان مدوخش نفسك
العناصر الكبيرة نقصها يظهر على الورق الكبير
والصغيرة على الصغيرة . مفهومة؟؟؟
الفوسفور نقصة يخلى الورقة حمراء او ارجوانية واحيانا في بعض النباتات النقص بيكون في صوره لو اخضر غامق للاوراق .
اهم الفترات احتياج للفوسفور اثناء التزهير
اشهر المركبات فى السوق لاضافة الفوسفور
مونو امونيوم فوسفيت
ومونو بوتاسيوم فوسفيت
حامض الفوسفوريك
يسعدنا تعليقك وتقييمك للموضوع