الكالسيوم»»»اسمنت الممتاز يتحمل ضغط السنين
»»»»»»»»»»»»»»»»»»»»»»»»»»»»»»»»»»»»»»
الجمله عاليه استخدمها احد مصانع الاسمنت للتعبير عن قوة منتجة
وامعانا فى توصيل الفكرة للمستهلك صوروا فيل بيقع من طيارة على منزل أحد الأشخاص🏘️🏚️
والغريب يا مؤمن ان لا الفيل مات والا البيت اتهد🐘🐘
هما طبعا ركزوا على البيت انه محصلوش حاجة بسبب استخدامة لنوعية اسمنت ممتازة🏚️🏚️🏚️
لكن مفسروش لنا ليه الفيل ممتش الصراحة🐘🐘🐘
ما علينا. نرجع لموضوع الاسمنت وهو لمن لا يعرفة مادة تشبة التراب وعند خلطها بالماء تتحول لمادة لدنه تشبة الطين ولكنها عنما تجف تتحول للحالة الصلبة ولا تعود لمادتها الاوليه مرة اخرى
تستخدم بين قوالب الطوب لتثبيتها بعضها ببعض
خلصت يا عم المقاول انت ؟ كل بوست توجع دماغنا بالافلام والدعايه
خلص يا عم وخش فى الموضوع الله يكرمك . فين الكالسيوم؟
ما انا لسه قايل لك يابنى . الكلام اللى فوق ده
فين يا عم انت هتستكردنى؟
يا عمنا الكالسيوم هو هو زى الاسمنت للنبات بيلزق الخلايا ببعض زى قوالب الطوب بالضبط
بس عامة المعلومة دى مشهورة ومعروفة
وكنا اتكلمنا عن الكالسيوم ودورة فى معالجة الملوحة فا مش هنكرر الكلام تانى
لكن هنتكلم اليوم عن اهمية الكالسيوم للعنب
ومواعيد اضافته وانسب وقت النبات بيمتصه فية
اولا الكالسيوم مهم من بداية خروج النبات وحتى بعد مرحلة العقد وايضا اثناء التخزين
طيب افضل وقت النبات بيمتص فيه الكالسيوم امتى؟
طوال فترة التزهير. اشمعنى
الكالسيوم عنصر تخين ما شاء الله علية الذرة بتاعتة كبيرة
وفوق كل دة عنصر بطئ الحركة
قوم ايه بقة مبيعرفش يدخل للنبات الا من القمم النامية للشعيرات الجذرية الحديثة ودى مبتبدأش تظهر الا وقت التزهير
فسيادتك فى المرحلة دى اضغط بالكالسيوم على قد ما تقدر
طيب بعد ما يحدث تغلظ للشعيرة فالكالسيوم بيجد صعوبة فى الدخول
نطلع فوق بقة للعناقيد نفس الكلام طول ما عنق الحباية لسه غض والمجرى بتاعة واسع اهو شغال وبيدخل
يحصل تغلظ خلاص انسى وغالبا الموضوع ده بيحصل عند ١٠:٨مم والكالسيوم خلاص تقريبا مش بيدخل
يعنى اللى ميلحقش نفسة قبل المرحلة دى خلاص
استنى يا عم انت اللى ميدخلش من الجذور يدخل من الرش انت بتتكلم ازاى؟
بص يا حبيب لا شك ان الرش ممكن يساعد ولكنه ابدا لن يعوض النقص
حته كيماوة كده ع الماشى
لما الاحماض الامينية تتحول لكربوهيدرات بينتج نتيجة التفاعل ده شوية مواد كده اسمها بكتات
يقوم الكالسيوم ياخدها من المحلول الخلوى ويكون معاها بكتات الكالسيوم وهى دى اللى بتمسك الخلايا ببعضها
مع بكتات المغنسيوم ايضا التى تقوم بنفس الدور
وهما الاتنين اللى بيقللوا من احتمالية الاصابة بمرض العنق الاسود او البلاك ستيم
الكالسيوم عنصر غير متحرك وتظهر اعراض نقصة على الورق الصغير ومن أعراض نقصة
1- جفاف القمم النامية للأفرع والجذور.
2- تظهر بقع ميتة على الأوراق
3- جفاف أطراف الأوراق حديثة النمو بعد أن تلتوي ثم تتقصف.
4- يلاحظ على الثمار بقع ميتة (متفلنة)
5- تكون الجذور قصيرة وملتوية وتموت معظم الجذور من القمة الأعلى.
اخيرا نتعلم من الكالسيوم
الصلابة والقوه فيما ينفع
خليك كالسيوم بين اصحابك وعائلتك وكن سبب فى ترابطهم
انك مهما كنت تخين وكسلى اكيد لك دور مهم😂😂😂😂
إيهاب خليفة فيسبوك
يسعدنا تعليقك وتقييمك للموضوع