حلول موضوع الملوحة
»»»»»»»»»»»»»»»»»»»»»»»
زى ما قلنا قبل كده لو عندك ملوحة تربة ومياه حلوه فمشكلتك مش مشكله
شوية غسيل باستخدام شوية مصلحات وتبقى فله
المشكلة اللى هنتكلم عنها هى مشكلة المياه
ودى مشكلتها زى ما قلنا زيادة عنصر الصوديوم والكلور
طيب الحلول عشان منطولش على الناس
بص يا عمده
انت بتعمل تحليل للمياه دى
التحليل ده بيعطك قيمه كليه اسمها Ecالتوصيل الكهربى او الاملاح الكليه ودى بتكون بحاجة اسمها الppm
اللى هى ايه؟. اللى هى بارت بار مليون 😁😁😁( جزء فى المليون)
الحسبة دى لازم تعرفها كمهندس زراعى
بص يا معلم
اللتر ماء =1000سم٣ اومللى لتر ( المسمين صح)
المتر المكعب ماء = 1000لتر
يعنى المتر المكعب فيه مليون مللى لتر او مليون سم٣
لو وضعت فى المتر المكعب(1000,000ملل لتر) 1جم من اى عنصر او ملح يبقى تركيز العنصر ده بيساوى 1 ppm
طيب لو حطيت كيلو عنصر يبقى التركيز كام. ؟. 1000 ppm
هاااااا مفهومة
خش على اللى بعده
التحليل بيقولك Ec مثلا 2500
معناها ايه يا عمده ؟؟؟ ان كل متر مكعب مياه فين 2.5 كيلو عناصر (املاح)
طيب كده حلو والا وحش
متقدرش تحكم الا اذا عرفت نسب العناصر اللى جوا التحليل
خاصة 3 عناصر هم الصوديوم والكالسيوم والمغنيسيوم
عشان مادخلكش فى حسبة برمة وحيس بيس
فيه علاقة بين الثلاث عناصر دول وبيترمز لهم فى التحليل بالرمز SAR
واقصر عليك الليله لو الرمز ده قيمته اقل من 5 تبقى فى تمام التمام يا معلم وفله منورة
طيب لو زاد من 5 الى 10 دا فى العادى ممكن التعامل معه
طيب لو اكتر من كده هتبدأ المشاكل وهتحتاج حلول متخصصه شوية
الحاجة التانية اللى هتبص لها فى التحليل عنصرى الكلور والكبريت
لو قريبين من بعض فى القيمه تبقى تمام
لو الكلور زياده يبقى هتحتاج تضيف كبريت سلفات او حامض بنسب يحددها لك الاستشارى
الحاجة الثالثة وهى الph القلوية وغالبا مياه مصر كلها تميل للقلوية من 7:9
ودى حلها وضع احماض اثناء فترة التسميد
طيب انت لخبط لنا دماغنا ونسب وبتاع عايزين حلول بالبلدى
احطياطى انت لازم تحط من طن الى طن ونص جبس زراعى للفدان كل عام على الخطوط
لازم برنامح الرى بتاعك يحتوى على احماض زى النيتريك والفوسفوريك والكبريتيك
لازم تزرع اصناف مقاومة للملوحة او مطعومة على اصول مقاومة للملوحة
لازم تهتم بالمادة العضوية وتخدم ارضك عل الاقل مرة كل عامين
لازم تعمل تحليل للمياه عندك كل سنه ولو لزم الامر حفر ابار جديدية على اعماق اكبر للحصول عل ماء حلو
استخدام نترات الكالسيوم بديلا لنترات النشادر كمصدر للنيتروجين والكالسيوم
استخدام الاسمدة التى تحتوى على السلفات مثل سلفات البوتاسيوم والمغنيسيوم والمنجنيز والزنك
استخدام معالجات الملوحة اذا لزم الامر
هناك بعض الحلول طرحت ولن احكم اذا كانت جيدة او لا انما الحكم لتجاربكم انتم وهو جهاز الفصل المغناطيسي (لا أرفضه او اؤيده . على الحياد)
طبعا الموضوع بتاع الملوحة اكبر من هذا بكثير
وما هذه الا الخطوط العريضة مبسطة
تحياتى إيهاب خليفة
إيهاب خليفة فيسبوك
يسعدنا تعليقك وتقييمك للموضوع